Helduentzako antzerki tailerra egingo da otsailean, Marina Anituak gidatuta

Marina Anitua artista eibartarrak Bartzelonan egin zituen antzerki ikasketak; egun, Soraluzen bizi da eta herritarrekin partekatu nahi lituzke bertan ikasitakoak. Hori dela eta, gazte eta helduentzako Denbora gabeko tartea antzerki tailerra antolatu du, esperientzia berri eta ederrak sortzea helburu, sormena, jolasa eta bakoitzaren momentu sakaratutak bermatuko dituen lau saioko ikastaroa, hain zuzen ere.

Ikastaroaren nondik norakoak

Antzerkia ez da soilik jarduera artistiko bat, baizik eta norbere burua adierazteko, emozioak esploratzeko eta zaurgarritasunari beldurra galtzeko espazio bat ere bada. Geure buruarekiko dugun espazioa zabaldu, eta bertatik sortuko dute antzerkia tailerreko parte-hartzaileek. 

Honako jardueren bidez landuko da gaia: meditazioa, gorputzaren kontzientzia eta entrenamendua, dantza librea eta konposizioa, baita askotariko joko eta dinamikak ere. Lau saioetan sormen-prozesua ulertzeko urratsak emango dira:

• Gaiak
• Materiala eta jantziak
• Testua
• Egoerak eta sormen-egoera

Ikastaroaren helburua antzerki fisikora gerturatzea izango da, antzerkiaren fenomenoa sakonago ulertzea eta gure ingurua zein ahots propioarekiko sentsibilitatea garatzea. Korapilo hauek askatuko dira tailerrean zehar: zer da antzerkia galderari erantzutea, sormenarekiko harremana hobetzea, jolas egitea (izan ere, pertsona helduek ere jolas egin dezakete) eta denborarik gabeko tarte bat izatea.

Saioak otsaileko zapatutanizango dira, goizeko 10:00etatik 13:00tara, Herri Antzokian. Saio guztietara etortzea gomendatzen da; edonola ere, saio batera edo gehiagotara joan daiteke.

Hartzaileak: Kreatibitatea piztu eta gorputz-mugimenduaren bidez antzerkiaren oinarriak ezagutu nahi dituzten pertsona jakin-minentzat. Maila guztietako jendeari irekia: bakoitzak bere erritmora lan egingo du.

Eguna: otsailak 1, 8, 15 eta 22, zapatuak 

Ordua: 10:00 - 13:00

Non: Herri Antzokia

Hizkuntza: euskara edo gaztelera, taldearen beharretara egokituz

Irakaslea: Marina Anitua

Izen-ematea eta informazioa

Informazio gehiago behar izanez gero, edo izena eman nahi izanez gero, hiru bide daude:

• Telefono zenbakia: 687344243
• Helbide elektronikoa: marina.anitua@gmail.com
• Galdetegi bidezko izen-ematea

Izen-emate kuota saio bakoitzeko: 20€

Izen-emate kuota tailer osorako: 70€

*Ordaintzeko arazoak baleude, egoerari egokitzeko prestutasuna.