Apirilaren 7tik 11ra Gabolatseko zubi berria muntatuko dute eta horrek eragina izango du aparkaleku eta garajeetan zein trafikoan

Apirilaren 7tik 11ra Gabolatseko zubi berria muntatuko dute eta horrek eragina izango du aparkaleku eta garajeetan zein trafikoan

2025/04/03
Datorren astean, apirilaren 7tik 11ra bitarte, egingo Moyua eraikuntza enpresak Gabolatseko zubi berriko muntaketa lanak; ondorioz, aldaketak izango dira aparkalekuetan, garajeetan zein trafikoan.

Joan den urtarrilaren 8an hasi ziren Gabolatseko zubi berriko lanak eta martxa onean doaz. Hurrengo fasean sartuko da proiektua datorren astean; izan ere, zubi berria jartzeari ekingo diote.

Hori horrela izanik, herriko hainbat puntutan martxan dauden obren eragina areagotu egingo da datorren astean, Gabolatseko zubiaren muntaketan jardungo baitu lanez arduratzen diharduen Moyua eraikuntza enpresak. Datorren astelehenetik barixakura, apirilaren 7tik 11ra, hain zuzen ere, aldaketak izango dira kaleko aparkaleku publikotan, garaje pribatuetan eta trafikoan.

Soraluzeko Hirigintza Departamentuak ondorengo neurriak hartu ditu.

Kaleko aparkaleku eta garaje pribatuetan eragina

Apirilaren 7tik 11ra bitarte, egunero:

  • Ez dira erabilgarri egongo Baltegieta 18 eta 24ko garaje pribatuak. Beraz, ezingo da bertatik autorik sartu edo atera.
  • Baltegieta 19 pareko kaleko aparkalekuak ez dira erabilgarri egongo goizeko 7:00etatik arratsaldeko 17:00ak arte. 

  • SAPAko aterpea aparkaleku publiko gisa habilitatuko da behin-behinean; bertan, 22 autorentzako tokia egongo da.
  • Ezozibideko lanetan ahalik eta aparkaleku gehien libratzen ahaleginduko dira beharginak aste osoan zehar.

Apirilaren 10ean eta 11n:

  • Gabolatseko aldapako aparkalekuak ez dira erabilgarri egongo. Aparkalekuak hustuta egon beharko dira apirilaren 10eko goizeko 7:00ak baino lehen.

  • Gabolats kaleko garaje pribatuak erabilgarri egon daitezen, bi egun hauetan Kalebarren kaleak eta Zubi Nagusiak oinezko izaera galduko dute eta Kalebarrenen bi norantzak baimenduta egongo dira. Zubi Nagusitik sartu eta irten beharko dute, beraz, Gabolats kalean garajeak dituztenek.

Garaje pribatu eta aparkaleku publikoetako trabak medio, udalak dei egin nahi die herritarrei garaje pribatuak erabilgarri izango dituzten pertsonek, mesedez, kalean aparka ez dezaten. 

Trafikoan eragina

Apirilaren 7tik 10era bitarte, egunero:

  • 7:55 - 8:15 bitarte, zirkulazioarentzat itxita egongo da Zubi Nagusitik Sagarerrekara bitarteko zatia; izan ere, Sagarerrekatik Baltegietara kontrako norabidean ekarriko dute goizero egun bakoitzean muntatuko duten zubi zatia.
  • Autobus erabiltzaileei ez die eragingo mozketak, autobus zerbitzurik ez dagoen ordutegian egingo baita garraio lan hau.

Apirilaren 10ean eta 11n:

  • Ezozibideko biribilgunetik Gabolatseko zubirainoko tartea itxita egongo da.

Bestelako neurriak

  • Gabolats 19 azpiko edukiontziak kendu egingo dira, eta horien ordez, Ezozibideko biribilgunean daudenak erabili beharko dira. 

  • Osteguneko azoka Plaza Zaharrean beharrean Zubi Nagusian izango da.

Udala herritarrekin eskertuta

Soraluzeko Udalak bere esker ona azaldu nahi die herritarrei Gabolatseko zubi berriaren lanek azken hilabeteotan sortutako traba eta eraginen aurrean erakutsitako jarrera ulerkorragatik.