Emakumeen Ahalduntze Eskola sortzeko bigarren bilera

Jakina denez, Soraluzeko Udaleko Berdintasun Batzordearen asmoa herritarrak elkartzeko, ikasteko, hausnartzeko eta prestatzeko gune bat sortzea da, ikastaro eta tailerren bidez emakumeen ahalduntzea bultzatze aldera.

Lehenengo bilera maiatzaren 13an egin zen. Bilera horretan, orain arte jasotakoa itzultzeaz gain, Soraluzen izan nahi dugun ahalduntze-eskolaren oinarriak ezarri ziren. Horretarako, hainbat kontu landu ziren: helburuak; proiektua gauzatzeko beharrezko egiturak; nortzuk; epe labur eta ertainean zer egin.

Bileran hainbat erabaki hartu ziren: koordinazio-mahai ahalik eta pluralena sortzea, Soraluzen dagoen emakume-aniztasunaren ordezkaritzarekin; ahalduntze-eskola edo modu parte-hartzailean sortuko den espazioa (izena zehazteke dago) irailean inauguratzea; iragarki-taula bat jartzea kaleko leku ikusgarri batean, emakumeek beren eskaintzak eta beharrak erakusteko aukera izan dezaten. Zerbitzu ordainduak izango lirateke, edo truke-sistema baten bidez funtziona liteke (alderdi interesdunek baloratu beharko lukete).

Ahalduntze-eskola diseinatzen jarraitzeko, ekainaren 20an (asteartea), arratsaldeko 18: 00etan, egingo da bigarren bilera Kalebarren 8ko enplegu bulegoan.

Parte-hartzea errazteko, zaintza-zerbitzua eskainiko da.

Bileraren helburuak ondorengoak dira:

• Koordinazio-mahaia sortzea
• Iragarki-taula diseinatzea
• Inaugurazioa antolatzea
• Irailera begira, ikastaroak, tailerrak, ekitaldiak eta abar proposatzea.

Udaleko Berdintasun Batzordeak Soraluzeko emakume guztiak animatzen ditu bigarren bilera honetan parte hartzera.