Ogasunarekin euskaraz!
Urtero garaitsu honetan egiten duen moduan, aurten ere errenta aitorpena euskaraz egitera eta, oro har, ogasunarekin harremanak euskaraz izatera gonbidatu egin nahi ditu heritarrak Soraluzeko Udalak.
Hori horrela, "Ogasunarekin euskaraz!" izeneko kanpaina abiatu du, Foru Aldundiarekin elkarlanean, orain hasi eta ekainaren amaierara arte. Kanpainaren helburua da 100.000 pertsona fisikok euskara aukeratzea Ogasun eta Finantza Departamentuarekin harremanetan.
Iazko kanpainan 476 soraluzetarrek egin zuten aitorpena euskaraz, guztizkoaren %24,30. Urtez urte hazten doan zenbatekoa da, zalantzarik gabe; hamar urte lehenagoko kanpainan, 2013koan, esaterako, 367 izan ziren errenta aitorpena euskaraz egin zutenak, guztizkoaren %18,21.
Nola aukeratu euskara edozein unetan
- Internetez: Ogasunarekin harremanetan jartzeko datuak Gipuzkoatarian aldatuz. Bertan, euskara aukeratu dezakezu harreman-hizkuntza gisa Ogasunarekin eta Aldundiarekin.
- Aurrez aurre: Ogasuneko herritarren arretarako bulegoetan edo Aldundiko erregistro zentralean 030 eredua aurkeztuz, partikularren kasuan; eta 036 eredua enpresen kasuan.
Nola aukeratu euskara errenta kanpainan
Aurtengo errenta-kanpaina abian da dagoeneko eta hilaren 8az geroztik onartu daitezke autolikidazio-proposamenak. Errenta mekanizatua egiteko epea apirilaren 16an zabaldu zen.
- Autolikidazio proposamena telefonoz (943113000) edo internetez onartzen duzunean adieraziz.
- Errenta mekanizatuko bulegoan laguntzen dizun langileari hala adieraziz.
- Foru Ogasunaren Zergabidea plataforman errenta aitorpena euskaraz aurkeztuz, aitorpena bidaltzean zure aukera adierazita.
- Aitorpena egiteko gestoria bat erabiltzen baduzu, errenta aitorpena euskaraz eginez eta Ogasunarekin eta Aldundiarekin dituzun harremanetan euskara aukeratuz.
Ogasun arloko hizkera ezagutu
- Errenta aitorpenaren hiztegia (UEMA)
- Herri ogasunaren hiztegia (PDF)
Aitorpena egiteko egutegia
2023ko ekitaldiko errenta aitorpena epearen barruan aurkezteko datak honako hauek dira:
- Proposamen modalitea 2024/04/08an hasi eta 2024/07/01ean bukatuko da.
- Internet modalitatea 2024/04/11n hasi eta 2024/07/01ean bukatuko da.
- Modalitate mekanizatua 2024/04/16an hasi eta 2024/07/01ean bukatuko da.